Дыялектны слоўнік. Частка 4

Апісанне: Пасля выдання ў 1970 г. трэцяга выпуску слоўніка працягу не адбылося. У навуковай грамадскасці склалася ўражанне, што вучоны спыніў далейшую працу ў гэтым кірунку. Архіўныя матэрыялы, адшуканыя Паўлам Міхайлавым апошнім часам, сведчаць пра адваротнае: Фёдар Янкоўскі пачынаў падрыхтоўку чацвёртага выпуску "Дыялектнага слоўніка", але па невядомых прычынах спыніў яе прыкладна, магчыма, у другой палове 1970-х гадоў. Доказам працягу працы над слоўнікам з'яўляецца машынапіс пад назвай "Старонкі з "Дыялектнага слоўніка", знойдзены намі ў Беларускім дзяржаўным архіве-музеі літаратуры i мастацтва, дзе захоўваецца навукова-творчая спадчына Ф. M. Янкоўскага. Адшуканая праца складаецца з кароткай прадмовы аб’ёмам у 1 машынапісную старонку i двух вычытаных i выпраўленых, напэўна, ужо пасля чытання выдавецкім рэдактарам, экзэмпляраў па 29 старонак слоўніка кожны.