ПРЫКМЕТЫ З НАРОДНАГА КАЛЕНДАРА, НАЗІРАННІ Авёс гаворыць: "Сей мяне ў гразь, то будзеш князь". Пястрак С.Д., 1907 г.н., 1984. Бялавічы Кос. Боб цвіце, сабака ліняе, бедны гаспадар хлеба не мае. Лушчык В.І., 1930 г.н., 2001. Альшаніца Квас. "Якрас калі цьвіце боп і да новага ўраджаю далёко, а старых запасоў німа, у сялянскай гаспадарцы наступая бясхлебіца" (тлум. інф.). Бусел кажа: "Удаўлюся, удушуся, але на дванаццатым тыдні вярнуся". Лушчык В.І., 1930 г.н., 2001. Альшаніца Квас. Г. зн. на дванаццатым тыдні пасля Калядаў. Варвары кусок ночы ўварвалі. Лушчык В.І., 1930 г.н., 2002. Альшаніца Квас. 4 (17) снежня – дзень святой Варвары; неўзабаве пасля яго паступова пачынае большаць дзень, меншае ноч. Грамніцы – палова зіміцы. Зайка А.Ф., 1948 г.н., 2001. Заполле Кос. Грамніцы – свята, якое адзначаецца 2 (15) лютага. Гром на крыгу – халодная вясна. Лушчык В.І., 1930 г.н., 2002. Альшаніца Квас. Гуляй, кіёк, апошні дзянёк, заўтра Пакровы – пасякуць на дровы. Лушчык В.І., 1930 г.н., 2001. Альшаніца Квас. На Пакровы (14 (27) кастрычніка ) жывёлу ўжо не выпускалі на пашу. Гусі ляцяць нізка – зіма блізка. Казімірчык А.П., 1928 г.н., 2001. Скураты Квас. Да Благавешча і зімы не лай, і саней не хавай. Зайка Ф.Я., 1907 г.н., 1980. Заполле Кос.