Як будзе ў людзей, то будзе і ў нас. Лушчык В.І., 1930 г.н., 2000. Альшаніца Квас. Чалавек схільны да пераймання, імкнецца не адстаць ад іншых. Як бяда, то не лезе ў рот і яда. Зубко Л.У., 1935 г.н., 2001. Бялавічы Кос. Як возьме свінню сыць, то дагары сцыць. Лушчык В.І., 1930 г.н., 2001. Альшаніца Квас. Пра чалавека, які дурэе з раскошы, вырабляе абы-што. Як вядзецца, то і певень нясецца. Лушчык В.І., 1930 г.н., 2001. Альшаніца Квас. Пра ўдачлівага чалавека. Як гукнеш, так і адгукнецца. Гоган А.Д., 1922 г.н., 2002. Заполле Кос. “Як ты зь людзьмі, гэдык і людзі да цябе” (тлум. інф.). Як дапячэ, то сам уцячэ. Трында А.У., 1963 г.н., 1978. Заполле Кос. “Як цяшко стане, сам дасьць лататы” (тлум. інф.). Як есць, так і робіць. Мінчук М.Дз., 1930 г.н., 1997. Галенчыцы Ягл. “Хто ў смак, хутко есьць, той і ў рабоці спрытны” (тлум. інф.). Як ёсць грошы, то ўсякі харошы. Лушчык В.І., 1930 г.н., 2001. Альшаніца Квас. Нават з фізічнымі недахопамі. Як жнуць, то і жонкі людзі. Казімірчык А.П., 1928 г.н., 2001. Скураты Квас. Даўней у час жніва асноўная работа клалася на плечы жанчыны, тады яна была паважаная асоба. Як запрагаюць, то “кось-кось”, а як запрагуць, то “но”. Лушчык І.І., 1928 г.н., 1991. Альшаніца Квас. Не заўсёды трэба верыць абяцанням. а) Як ловяць, то “кось-кось”, а як зловяць, то дугою. Бабей Р.Д., 1911 г.н., 1995. Ёдчыкі Квас.