Ï– Насовіч, с. 131: Праўда вочы колець; Прыказкі, кн. 2, с. 434: Праўда вочы коле. Праўда наверх выйдзе. Праўду не схаваеш, яна абавязкова выявіцца. Успомнілі, што і тады, пасля суда Соміка з Наздрэйкам, ён [Агей] усё на штосьці намякаў, кажучы, што злодзея шукаюць не там і што праўда наверх выйдзе (К. Крапіва. Мядзведзічы). – Галя Сяміножка дуб дубам... – А ў журнале ў Галі адны пяцёркі, – уздыхала маці. – Нічога, – супакойваў нас бацька. – Праўда, знаеш, наверх выйдзе (В. Мыслівец. Выгнанне грэшнікаў). – Янкоўскі, с. 156: Праўда наверх выйдзе. Праўда не скварка, з кашаю не з'ясі. Праўда непазбежна пераможа. Вось тады, калі вынікала якая заблытаная справа агульнавясковага характару, злазіў з печы зусім стары ўжо дзед Мікодым, выходзіў на вуліцу і голасна зазначаў: – Вы не думайце таго – праўда не скварка, з кашаю не з'ясі. Выйдзе наверх яна, родная, бо ўжо сама зямля прысягала небу не пускаць адгэтуль цёмнай, заблытанай праявы (Я. Колас. На ростанях). – Прыказкі, кн. 2; с. 433: Праўда не скварка – з блінам не з'ясі. Праўду не схаваеш. Кажуць, калі вераць у перамогу справядлівасці. Сін.: Жыццё закон нязломны мае: ніколі праўда не ўмірае; Усё мінецца, а праўда застанецца. [Марозаў:] Каця, неадкладна званіце на пошту, папярэдзьце жонку тэлеграмай. [Жук:] А што хаваць? Ды і праўду не схаваеш. [Лена:] Якую праўду?! [Жук:] Многія... бачылі. Калі хочаце, я ніколі не хлусіў (А. Дзялендзік. Начное дзяжурства). – Янкоўскі, с. 156: Праўду не закапаеш (не схаваеш). Праца не воўк, у лес не ўцячэ. Гл. Работа (праца, справа) не воўк, у лес не ўцячэ (не збяжыць, не пабяжыць). Працу палюбіш – чалавекам будзеш. – А ці не лепей пайсці працаваць? – сам сабе разважаў Кулік. – Працу палюбіш – чалавекам будзеш (І. Гурскі. Чужы хлеб). – Рабкевіч, с. 169: Працу палюбіш – чалавекам будзеш. Працуюць і смаку не чуюць. Гаворыцца пра незадаволенасць чыёй-н. працай ці пра яе безвыніковасць. [Цёця Каця:] Зараз год, як я на гэтым месцы, а не магу ўцяміць, што тут людзі робяць. Такі ж каваль у кузні куе, то знак ёсць, настаўнік дзяцей вучыць, і то знак ёсць, а тут людзі нешта робяць, робяць, і работы гэтай не відаць. [Нічыпар:] Кажаш, працуюць і смаку не чуюць. [Цёця Каця:] Яны, можа, і чуюць, але я не бачу, які тут смак. Нейкія ўсё каменні, косці перабіраюць, пясок перасыпаюць (К. Крапіва. Хто
Дадатковыя словы
зясі
0 👁