Шчыпяры — тс., Маст., Слон. (П. С.); шчыпары — тс., Ваўк. (Сцяшк.). — Польск. szczypiór: 1) сцябло цыбулі, 2) часнок (Карл., VI, 596). Відаць, у гаворкі слова трапіла з польскай мовы, дзе яно агульнавядомае і выступае з больш шырокім семантычным аб'ёмам. Салата ж. Накрышанае лісце салаты, прыпраўленае соллю і смятанай. Нічого ні хочацца есьці, мо салаты нарабіць, ужэ салата нарасла. Гр. Страва атрымала назву ад расліны. Салата — запазычанне з французскай мовы, дзе salade ад італ. salata (салёная зеляніна) < лац. salare — 'саліць' (ЭСРЯ, II, 247). Зяленіва (зяленіво) н. Агульная назва садавіны і агародніны. То яблыкі, то паміндоры ці моркву рве і есьць нашчо. У нас зяленіва ні бракуя. Ст. С. Зяленіва — зелень (овощи) (РБС-53, РБС-28); зяленіва — 'зелень' (у розных значэннях) (БРС-62). Утворана слова пры дапамозе суфікса -ів-а ад зелень, якое бытуе ў рускай, украінскай і польскай мовах, параўн.: балг. зеле — 'капуста', с.-х. зелье — 'шчаўе', чэшск. zeli — 'капуста'. Слова паходзіць ад назвы колеру (зялёны). Сырынішча (сырынішчо) н. Сырая агародніна, садавіна (у процілегласць варыву). Сырынішчам жывот напхаў, а сілы ні дасць яно. Лепяй скварку якую зьзеў бы, то трывуляй было п. Гр. Сырызна —'сырая агародніна', Віц. (ВКС).