МАСЛЮК м. 1. Страва, прыгатаваная з тоўчанага маку і цукру. Маслюк гатавалі так: таўклі мак і сахару туды сыпалі. А тады елі з хлебам. Груздава, Казлоўшчына Паст. 2. Страва, прыгатаваная з канопляў і цыбулі. Каноплі таўклі ў ступе, дабаўлялі цыбулі, солі і гэтак елі. А страву такую называюць маслюк. Грэйцева Паст. МАСЛЮК м. Масляк, казляк, грыб з жоўта-карычневай ліпкай шапкай. І маслюкі бяры: іх тожа ядуць. Стары Лепель Леп. МАСЛЯНКА ж. Маслёнка, вадкасць, якая застаецца пасля збівання масла. Маслянка – гэта тое, што застаецца пасля збівання масла. Чурылава В.-Дзв. Нешта гэты раз маслянкі мала засталося. Тумілавічы, Шантары Докш. Маслянку не вылівай: яна мне нада. Лужкі Шарк. МАСНІЧЫНА ж. Дошка ў падлозе. Маснічына на кухні праламалася. Лужасна Віц., Канашы Гар. МАСТАЧАННЕ, МЫСТАЧАННЕ н. Майстраванне. Што выйдзіць з твайго мастачання – лодка ці верацяно? Барсукі Дубр. Мыстачанне тваё ўвесь вольны час займае. Парфенаўка Дубр. МАСОЛІЦЬ незак. Забруджваць. Вось так ваду ў калодзежах чаруны масоліць могуць. Ноўка Віц. МАТАРОК м. 1. Завязка, вяровачка. Дай ты мне які матарок, каб сумкі звязаць. Угрынкі Уш. Параўн. матуз у 3 знач., матузіна, матузініна. 2. Повад. Матарок вазьму і іду за каровай. Калінавая Міёр. Параўн. матуз у 4 знач. МАТКА, МАЦЁРА ж. Пасаджаная ўвесну, старая бульба, якая не паспела за лета згніць у зямлі. Сёлета цяжка атлічыць матку ад маладой бульбы, бо яна добра сахранілася. Чэрнева Брасл., Угрынкі Уш. Бульба, з якой вырасла новая, у нас называюць мацёра. Масленікі Паст. МАТЛЯЦЬ незак. Накручваць. Трэба матляць клубок нітак. Галбея Паст. МАТОК м. Нізка, нанізаныя на нітку, дрот і інш. якія-н. аднародныя прадметы (грыбы, рыба, цыбуля і інш.). Сын прадаў на базары ўчора тры маткі грыбоў. Угрынкі Уш. Залетась навязала сем маткоў цыбулі, а сёлета толькі тры. Барсукі В.-Дзв. Маток цыбулі дачцэ аддала. Ідоўта Міёр. МАТРАХЛЯССЕ н., толькі адз. Старыя непатрэбныя рэчы. Трэба павыкідваць тое матрахляссе, што ў нас у сенцах яшчэ з таго году ляжыць. Селішча Арш. МАТУЗ м. 1. Завязка ў фартуху. Унучачка, прышый ты мне матузы к фартуху. Баравуха Пол. Бабка, у цябе матуз развязаўся. Вялікае Сяло Сен. Учора зачапілася за гвозд ў хлеве і адарвала матуз на хвартуху. Слабада Шум. 2. Шнурок. Малыя дзеці доўга не ўмеюць завязваць матузы на абутку. Гута Паст., Угрынкі Уш. 3. Завязка,