ЗБАЁДАЦЬ – знянацку разбіць, знішчыць. – Хоць бы ён слоік не збаёдаў, бо цяпер усё такое дарагое. ЗБУТНЕЦЬ – (расліне пайсці не ў карысны плод, а ў непатрэбны ліст). З БУХТЫ БАРАХТЫ – нечакана для субяседніка ці іншых, без падрыхтоўкі, таму не вельмі ўдала, не да месца. ЗБЭРСАЦЬ – не вельмі шыкоўна зрабіць, пабудаваць, пашыць, звязаць, сплясці што-небудзь. ЗВАДЫЯШ – той, хто правакуе на дрэнныя ўчынкі, зводзіць з добрых паводзін. ЗДЗІЦЯЦЕЦЬ – здзяцінець. ЗДОХЛІК, ЗДОХЛІЦА – слабое здароўем дзіця, падлетак, дзяўчынка. ЗДОХЛІК НЕЎМІРУЧЫ – кашчэй бессмяротны. ЗДРОК БЯРЭ – Ванцаты гэты ніяк не супакоіцца: яго ўсё здрок (халера) бярэ. ЗДРЭЙФІЦЬ – адмовіцца ад першапачатковага плану, змаладушнічаць. ЗЕЛЯПАЦЬ – гаварыць абы што крыўляючыся. ЗЕЎРАЦЬ – быць адчыненымі (пра дзверы); пра вялікую адтуліну ў чым-небудзь. – Дзверы ў хляве дак мо цэлу ноч зеўралі. Б З КІПЯЧА ГАРШКА – у апошні момант, ледзь паспеўшы. З КОПТЫРАМ – вельмі многа, з верхам (насыпаць чагосьці). К ЗЛАБУДАЦЬ – пабудаваць што-небудзь, сшыць, звязаць, сканструяваць несамавітае; зрабіць што-небудзь, але не вельмі важнае. ЗМАГЧЫСЯ – стаміцца, выбіцца з сіл. З МУХАМІ – з норавам, ганарлівы(ая), такі(ая), што не падступішся. – Вельмі яна ўжо з мухамі, нават матку ў гэтым прайшла. ЗОЛКА – не цёпла, холадна на дварэ. З ОПУХА – вельмі брудны. К ЗРАБІЦЬ НА ПАКІНЬ – аблаяць каго-небудзь ушчэнт, раскрыўшы для ўсіх такія яго «таямніцы», што апраўдацца яму ўжо, здаецца, немагчыма. ЗРУГАВАЦЬ (г – выбуховае) – спраўна, удала скіраваць тачку, воз, машыну на дрэннай дарозе.