СКОКАМ. Скокам-бокам. Абы-як, неакуратна (зрабіць што-н.). Гэты Казік зрабіў – не зрабіў, а скокам-бокам ды даляй пайшоў, а ты за ім падграбай усё. Забалацце Карэл. (СГВ, 606). То скокам то бокам. Як-небудзь, усяляк, рознымі спосабамі. То скокам то бокам – і неяк жа жывём. Парэчча Навагр. (ХБД, 213). СКОРЖЫК. Як у Скоржык на вяселлі шумець і пад. Чаго рашшумеліся як у Скоржык на вясельлі, угамону на вас німа! Першамайск Шчуч. ● Скоржыкі – назва вёскі ў Шчучынкім раёне. СКРУЦЭННЕ. На скруцэнне галавы бегчы, ляцець і пад. Вельмі хутка, імкліва, стрымгалоў. Як даведаўся, што грыбы растуць, на скруцэньне галавы папёр у лес. Вугляны Смарг. Пабёх на скруцэня галавы, хіба я яго ўтрымаю? Бабіна Гродз. СКРЫВА. Скрыва паглядаць на каго, на што. Няўхв. Непрыязна, з недаверам адносіцца да каго-н. Ён даўно на міне скрыва паглядае, а за што – ні ведаю. Трычы Гродз. (СНМ-2, 155). СКРЫДЛЫ. Скрыдлы апусціўшы хадзіць. Разгублена, страціўшы рашучасць, актыўнасць. Дзеўка ходзя, скрыдла апусціўшы, як пава. Малі Астр. (СПЗБ-4, 462). ● Скрыдла – крыло; параўн. польск. skrzydło 'тс'. СКРЫНКУ. Лезці ў скрынку. Паміраць. Трэба ўжо збірацца лесці ў скрынку. Івашкаўцы Смарг. (СПЗБ-4, 464). СКРЫПАМ. За адным скрыпам. Разам, за раз, заадно. Хай бы ўжо выходзілі ўсе за адным скрыпам, ато хату толькі выстуджваяця. Беражна Карэл. (ЖНС, 62). Прынясі вядро за адным скрыпам. Дроздава Лід. СКРЫПКУ. У скрыпку высахнуць. Вельмі (схуднець). Высахла баба ў скрыпку. Радзевічы Гродз. (СНМ, 179). Вось да чаго гора даводзіць, высахла ў скрыпку. Старынцы Бераст. Кап ты яе бачыў, высахла ў скрыпку. Алекшыцы Бераст. СКУЛА. Ліхая скула. Няўхв. Кепскі чалавек. Гэта ліхая скула як прыстаня як смала, то ад яго аццапіцца нельга. Любянцы Воран. (СГВ, 597). Ну і ліхая скула тая дзяўчына. Малюкі Воран. Скула пагнала каго куды. Няўхв. Хто-н. пайшоў, паехаў куды-н. Куды ш яго скула пагнала? Столькі часу німа. Малюшычы Карэл. Як ліхая скула прычапіцца. Няўхв. Неадчэпна (прычапіцца, прыстаць і пад.). Прычапіласа да міне эта хвароба як ліхая скула і ніяк ні атпуская. Лунна Маст. Як скула ў роце замінаць. Няўхв. Вельмі, моцна (замінаць). Кап цібе куды-нібуць збыць, а то ты прамо як скула ў році замінаяш. Дарагляны Маст. СКУЛАЙ. Як з балючай скулай насіцца. Неапраўдана ўдзяляючы шмат увагі каму-, чаму-н. Носіцца са сваім Ванем як з балючай скулай. Свір Мядз. СКУЛЕ. Як скуле не дагадзіць і пад. Зусім (не дагадзіць). Яму ніяк не ўгодзіш, як скуле. Чамяры Сл. (ППФВ, 75). СКУЛУ. Скулу ў бок каму. Выкл. Выказванне незадаволенасці кім-н. Скулу табе ў бок, каб табе скула выскачыла на носі. Нагародавічы Дзятл. (МСГВ, 456). Хоць скулу дай каму. Няўхв. Немагчыма пераканаць, спыніць дзеянні каго-н. Як уб'юць сабе што ў галаву, дык хоць ім скулу дай, усё роўна будуць рабіць сваё. Купіск Навагр. СКУР. Сем скур спусціць і голым у Афрыку пусціць каго. Паграж. Моцна насварыцца на каго-н., прабраць, пакараць каго-н. Папробуй толькі ні прыдзі да дванастай дахат, сем скур спушчу і голым у Афрыку пушчу. Новая Руда Гродз. СКУРА. Адна (адны) скура ды косці. 1. у каго. Хто-н. вельмі схуднеў. У яго адна скура ды косьці. Квасоўка Гродз. Божа ж мой, і есьці хватая, а ты толькі паглядзі на яго, у яго адныйя ш косьці ды скура. Дзям'янаўцы Дзятл. 2. Вельмі худы, змарнелы. Посьля хваробы страшна глянуць было на яе – адны скура ды косці. Старынцы Бераст. Вар. толькі (адна, адны) скура (шкура) ды (да, і) косці засталіся