Кратавінне — нарытыя кратамі купкі зямлі. Увесь гарод у кратавінні, як завёўся крот. Кратацца — рухацца. Як бы цяжка ні было, трэба кратацца, каб жыць. Крок — шырынка. Зашпілі крок, а то пітуха свайго згубіш, вылеціць. Кроклы — кроквы; яшчэ — тыповы, прыродны, характэрны. Глядзіш, к зіме ў сваю хату ўвойдзім, ужо й кроклы паклалі. Кроклы ўжо парашацілі, засталося драніцамі пакрыць — і страха гатова. Сімкін — кроклы жыд, з усіх вылучаіцца. Круглёвіна — кружляк, круглы кавалак. Дзве круглёвіны здору таплёнага дала яму. Кругловіна — яма, калдобіна. Дажджы прашлі, і ўсю дарогу кругловіны пабілі. Кружнік — скручанае ў круг. Цэлы кружнік дроту валяецца. Круканосы — гарбаносы; нос, як у крука. У Праксэды сын круканосы, а мужык з кірпатым носам. Крупяная — з круп. Кашы крупяной наварыла, укруціла ў фуфайку, каб ня стыла. Крутадушнік — няшчыры, двурушны, крывадушны. Німа яму веры, крутадушніку, вечна душой круціць. Крутарог — з крутымі (гнутымі) рагамі (казёл); яшчэ — мужчынскі струмант. Ёсь у мяне крутарог, што шавеліць паміж ног. Крутуха — порсткая жанчына; яшчэ — полька-крутуха. Яніна такая крутуха, на месцы ня ўседзіць ні хвіліны. Так уляглі ў польку-крутуху, — духі вон! Круцікі — розная жамяра ў вадзе. Даланёй балацінку працісніш, здзюмухнеш круцікаў і п'еш.