* Курыца-квактуха Вадзіла дзяцей Каля кляцей. Квок — сесці На чырвоным месці. («Квактуха» — дзіцячая гульня часінаў мамы.) Кошачка-ласачка, дзе была? — У папа. — Што рабіла? — Кросны ткала. — Што заробіла? — Кусок сала. — А дзе дзела? — Сама з'ела. — Апсік, апсік! (Лічылка.) * Казаў бацька: казу дам І з маленькім казяням. Будзем казу даіці, Казлянятак паіці. Казу дам, казу дам І з маленькім казяням. (Прыпявалі, танцуючы з малым «казу»). Пахадні — гульня, забава, каб заняць дзяцей. Каб адчапіцца ад надаядлых і шумных малых, каб хоць на час пацішэла ў хаце, звычайна гаварылі: «Збегайце вазьміце ў Музыканціхі пахадні». Малыя бягуць у крайнюю хату: «Матка сказала, каб мы забралі нашы пахадні». А там ужо ведаюць, што гэта проста забава, і пасылаюць да Мікіціхі, а Мікіціха пасылае да Піліпіхі. І так, пакуль усю вёску абгаляпуюць, суцішацца дуронікі й на паветры набудуцца. Пікар — дзіцячая гульня, у якой рознымі спосабамі палкай збіваецца бляшанка.