НАЗВЫ СТАЛОВАЙ БЯЛІЗНЫ І НЕКАТОРЫХ ПРАДМЕТАЎ УПРЫГОЖАННЯ Настольніца ж. Абрус. Настольніцу накінь на стол, хай мухі ні поўзаюць. Ст. С. Харошу настольніцу с кутасамі купіла ў лаўцы. Гр. Настольніца — 'абрус', Пруж. (Зян.); настольнік — 'абрус', Дошк. (Мат., 76), Чырв. (Бір.). Паводле ДАБМ (карта 325), слова настольніца пашырана на поўдні Гродзеншчыны, поўначы і ўсходзе Брэстчыны. Настольница, настольник, настульник — 'абрус' (ЛП, 298). Настольнік і настольніца — скатерть (БРС-62). — Руск. (дыял.) настольник, настольница — 'скатерть' (Даль, II, 476), укр. (дыял.) столувка, столивка, стулник (ЛАУГ, карта 59). Утворана слова настольніца ад стол: настоль-ніца. Літаральнае значэнне — 'тое, што пакрывае стол'. Цырата ж. Як стол накрыяш цыратаю, то лёхко мыць, праціраць яго. Вар. Цырата — клеёнка (РБС-53, БРС-62). — Укр. (заходняе) церата — 'цырата', польск. cerata — тс. Слова цырата прыйшло з польскай мовы, дзе cerata з італ. cerroto — 'наваскаваны'. (Брукн., 58).