СТАНОК м. Станіна ў кроснах. Станке змацоўвалі збойнямі. Зарубічы. СТАЎБУНОЎКА ж. Высокая шапка з казырком чорнага колеру, якую насілі вясной. СТАЎНІЦА ж. Вялікая бочка для ссыпання збожжа. Ужэ лёто, а ў яго яшчэ ніпачатая стаўніца жыта. Бандары. СТАЦІВА ж. Тое, што і станок. СТРАМАК м. Чатырохгранны шуфлік на доўгай ручцы для выкідвання торфу з кар'ера. СТРЫХАР м. Фармоўшчык цэглы на цагельні. Некалі стрыхар выганяў много грошай. Дакалавічы. СТРЫХМУС м. Сталярная прылада для правядзення лініі, паралельнай краю дошкі. Гэты стрыхмус я як маладым быў зрабіў, а гэты яшчэ дзедаў. Дзерачынак. СТРЫЦА ж. Калёсіка ў калаўроце з выемкай, на якую накладваецца шнур. Падкруці стрыцу, кап шнур не спадаў. Свіслач. СТУСІНА ж. Гібкае дрэўца для пугі, звычайна прывазное. А я думала, што стусіны ў Празароках растуць, азноў іх куплялі. Свіслач. СТУСЛА ж. Сталярная прылада, скрыня, пры дапамозе якой распілоўваюць дошкі пад вуглом 90° і 45°. Бес стуслы правідлова вугла ні зарэжаш. Свіслач. СТЫРНІК м. Старшы ў плытагонаў, асоба, адказная за праводку плытоў. СУРОВЫ КУЖАЛЬ. Нябеленае саматканае палатно. Некалі шылі сарачке з суроваго кужалю. Бакуны. СУХАПАСТОЙ м. Сухастой. Стражнік дазволіў рубаць сухапастой. Рагачы. СУЧКІ мн. Невялікія дапаможныя санкі для перавозкі бярвення. Прычапі сучкі да саней, паедзям у лес. Кавалічы. СЬЦЯКОЛЬНІК м. Сталярная прылада для выразання пазоў у аконных рамах, куды ўстаўляюцца шыбы. Сьцякольнік нешта не бярэ, забіўса. Дзерачынак. СЯЛЕДЗЯЎКА ж. Бочка з-пад селядцоў. Купіў сяледзяўку, добро будзя капусту квасіць. Сухая Даліна. ТАКАРНЯ ж. Прымітыўны такарны станок для вырабу калаўротаў. ТАМАВАНЕ н. Месца ў рацэ, дзе накідана каменне, каб вада не размывала бераг. Плытэ як на тамаване ўзыйдуць, могуць разьбіцца. Дарошавічы.