Вантух! 1985. Бялавічы Кос. Вантух — жывот, трыбух. Кажуць на тоўстага чалавека. Варона бязмозглая! 1985. Сярадава Жытл. Неразумны. Ваўкарэзіна! 1993. Заполле Кос. Кажуць на ліхога чалавека. Вашывік! 1985. Скураты Квас. Вашывік — той, хто завашывеў; неахайны, брудны. Вельмі зняважлівая абраза. Вогір! 1996. Квасевічы Квас. Вогір — жарабец. Так насміхаюцца з ганарліўца. Волік! 1997. Хадоркі Кос. Пра маруду, гультаяватага чалавека. Выбай! 1981. Заполле Кос. Першае значэнне слова — гультай, другое — распуснік. Выдра! 1985. Гошчава Стайк. Кажуць на сварлівую жанчыну. Выжла! 1985. Заполле Кос. Кажуць на жанчыну, якая дамагаецца свайго ўсімі сродкамі, нават амаральнымі. Вырадак! 1985. Мілейкі Міл. Пра таго, хто сваімі паводзінамі ганьбіць сям'ю, род. Вырвус! 1997. Жамайдзякі Міл. Вырвус — няўрымста, свавольнік. Выскірка! 1999. Альшаніца Квас. Кажуць на жанчыну, якая без прычыны смяецца. Гадота! 1983. Альшаніца Квас. Пра таго, хто выклікае агіду; брыдота. Гад печаны! 1985. Заполле Кос. Пра нядобрага, ліхога чалавека. Галавач! 1996. Альба Квас. Чалавек з вялікай галавой, галавасты.