Татаршчына ж. Урочышча на паўночны захад ад вёскі Саломенка ў Капцёўскім сельсавеце. Тураў луг (лух). Урочышча, луг у Зарубіцкім лесе побач з вёскай Путна на ўсход ад вёскі Зарубічы ў Індурскім сельсавеце. Туроўскага сажалка ж. Сажалка, штучны вадаём недалёка ад сядзібы селяніна Туроўскага ў вёсцы Зарубічы ў Індурскім сельсавеце. Тэалін м. Урочышча ў гарадскім пасёлку Сапоцкін каля старога касцёла. Узбераж (узбераш) ж. Урочышча, палетак ворнай зямлі на ўсход ад вёскі Ліхачы ў Парэцкім сельсавеце. Удзешкі мн. Урочышча, мокрае балота на ўсход ад вёскі Цыдовічы ў Гожскім сельсавеце. Унукаўшчына ж. Палетак ворнай зямлі на поўнач ад вёскі Калбасіна ў Каробчыцкім сельсавеце. Усава н. Вёска (да 1964 года Вулька Даргунская) ў Сапоцкінскім пасялковым савеце. Носіць імя героя Віктара Міхайлавіча Усава. Фарштат м. Урочышча, старая назва занеманскай часткі горада з часоў княжання Вітаўта, вялікага князя літоўскага (1350-1430), дзе былі паселены немцы-прамыслоўцы. Федарышкі мн. Урочышча, сенажаць недалёка ад вёскі Пяслі ў Адэльскім сельсавеце. Фенькава н. Урочышча, мяшаны лес за 10 км на поўдзень ад горада Скідаля. Фолюш м. Урочышча над ракой Ласасянкай на захад ад Гродна; тут некалі была сукнавальная фабрыка і фабрыка паясоў. Французава гара ж. Узвышша на паўночны ўсход ад вёскі Падліпкі ў Адэльскім сельсавеце. Фэрма, невялікі населены пункт, вёсачка ў Квасоўскім сельсавеце. Фэрмянскае балота н. Урочышча, сенажаць і выган сялян з вёскі Фэрма. Хаміцкая рэчка ж. Старое рэчышча ракі Свіслачы на поўнач ад вёскі Свіслач у Квасоўскім сельсавеце. Хваты мн. Вёска ў Скідальскім сельсавеце, з 1972 года ўвайшла ў склад горада Скідаля. Хлебадай м. Урочышча на захад ад вёскі Кругілікі ў Індурскім сельсавеце, былы маёнтак. Хліставічы мн. Вёска, былая ваколіца ў Квасоўскім сельсавеце. Хмеляўшчына ж. Урочышча, палетак ворнай зямлі каля вёскі Скамарошкі ў Каробчыцкім сельсавеце. Хмяльніцкія сажалкі мн. Сажалкі, рэшткі старога рэчышча ракі Свіслачы каля вёскі Лугавая (раней - Пацэнкі) у Індурскім сельсавеце.