Адам Варлыга

Гладкі Язэп (псеўданім Адам Варлыга) нарадзіўся 4 кастрычніка 1890 у вёсцы Міхалкавічы Лагойскага раёну. У 1921-1930 г. працаваў настаўнікам, у 1935 г. закончыў Менскі педінстытут, пазней стаў навуковым супрацоўнікам Інстытута школьнай педагогікі ў Менску. У 1941-42 настаўнічаў у роднай вёсцы, але пад ціскам партызанаў на пачатку 1943 пакінуў працу і пераехаў у Менск, уладкаваўшыся ў Выдавецтве школьных падручнікаў і літаратуры для моладзі. З лета 1944 у эміграцыі ў Нямеччыне і ЗША. Аўтар кніг «Краёвы слоўнік Лагойшчыны», «Прыказкі Лагойшчыны» і інш. Пакінуў ненадрукаваныя ўспаміны «Бачанае, чутае, перажытае». Памёр 28 ліпеня 1972 у Нью-Ёрку.